Rydym ni eisiau gwneud yn siŵr bod gan Gymru’r ynni sydd ei angen arni mewn byd Sero Net.
Mae potensial di-ben-draw i ynni adnewyddadwy yng Nghymru – yn enwedig o’r gwynt sy’n chwythu ar draws ein bryniau a’n mynyddoedd. Ond mae angen i ni sicrhau bod yr ynni gwyrdd sy’n cael ei gynhyrchu yn cyrraedd y cartrefi, ysbytai, ysgolion, busnesau a chymunedau sydd ei angen yng ngweddill Cymru a thu hwnt.
Adeiladwyd llawer o’r seilwaith trydan presennol yng Nghymru flynyddoedd lawer yn ôl i gludo trydan o hen orsafoedd pŵer tanwydd ffosil yn y gogledd a’r de. Nid oes gan y rhwydwaith presennol yng Nghanolbarth Cymru ddigon o gapasiti i gysylltu’r holl ynni adnewyddadwy newydd sydd ei angen arnom ar gyfer ein cartrefi a’n busnesau, yn lleol ac yn genedlaethol. Rydym ni angen seilwaith newydd ar frys er mwyn rhoi’r gorau i ddefnyddio tanwydd ffosil.
Rydym ni eisiau creu dyfodol cadarnhaol a glân i bob un ohonom. Rydym ni’n gweithredu nawr i adeiladu a gweithredu rhwydwaith ynni gwyrdd i Gymru, a fydd yn sicrhau bod ynni adnewyddadwy yn gallu cyrraedd ein cartrefi, ein hysbytai, ein hysgolion, ein busnesau a’n cymunedau.
Mae Green Generation Energy Networks Cymru (Green GEN Cymru) yn chwarae rhan allweddol yn y gwaith o ddarparu rhwydwaith dosbarthu dibynadwy a chadarn a fydd yn mynd i’r afael â’r argyfwng ynni a’r argyfwng hinsawdd. Bydd hefyd yn grymuso cymunedau gwledig drwy fuddsoddi, swyddi a sgiliau, gan alluogi cymunedau i fyw bywydau trydan modern.
Green GEN Tywi Wysg
Mae ein hail ymgynghoriad anstatudol bellach ar agor yn awr:
Dydd Mercher 13 Mawrth i ddydd Mercher 8 Mai 2024.
Rydym ni wedi gwneud nifer o newidiadau i’n cynlluniau gwreiddiol – lleisiwch eich barn am ein cynigion diwygiedig.
Cysylltu ynni glân a gwyrdd o eneraduron adnewyddadwy yng Nghymru â’r rhwydwaith trawsyrru cenedlaethol.
Cysylltiad trydan 132kV newydd yw Green GEN Tywi Wysg, a fydd yn cludo ynni glân a gwyrdd o eneraduron adnewyddadwy yng Nghymru i’r rhwydwaith trawsyrru cenedlaethol.
Bydd cysylltiad arfaethedig Tywi Wysg yn cysylltu Parc Ynni Nant Mithil Bute Energy, a fydd yn cynhyrchu ynni gwyrdd, glân yn ardal Coedwig Maesyfed, â’r grid cenedlaethol ger Llandyfaelog, Sir Gaerfyrddin.
Yn bwysig, bydd prosiectau ynni gwyrdd eraill – gan gynnwys Parciau Ynni arfaethedig Bute Energy, Aberedw, a Bryn Gilwern – hefyd yn gallu cysylltu â llinell arfaethedig Green GEN Tywi Wysg, gan leihau faint o seilwaith ychwanegol fydd ei angen yn y dyfodol. Rhagwelir y bydd y ddau barc ynni yn defnyddio llinellau uwchben cylched sengl sy’n cael eu cynnal ar bolion pren i gysylltu â Green GEN Tywi Wysg.
Gallai Green GEN Tywi Wysg hefyd ganiatáu cysylltu prosiectau cymunedol yn uniongyrchol, gan leihau’r pwysau ar y grid trydan presennol, cefnogi cadernid ynni, busnesau gwyrdd a galluogi gwres gwyrdd a chyflwyno cerbydau trydan ledled Cymru – yn enwedig mewn ardaloedd gwledig.
Ein cynigion gwreiddiol
Yn ystod gwanwyn 2023, fe wnaethom ymgynghori â phobl leol ynghylch y llwybr rydym ni’n ei ffafrio ar gyfer Green GEN Tywi Wysg.
Ein cynnig gwreiddiol oedd llinell uwchben cylched dwbl, wedi’i chario ar beilonau dur, drwy gydol y llwybr.
Ein cynigion diwygiedig
Gwnaethom ystyried yn ofalus yr holl adborth a gafwyd yn ein rownd gyntaf o ymgynghori, ynghyd ag asesiadau amgylcheddol a thechnegol pellach. Rydym bellach wedi adolygu ein cynlluniau ac wedi nodi aliniad drafft y llwybr sy’n dangos ble y gallid lleoli’r seilwaith.
Rydym ni wedi gwneud nifer o newidiadau, gan gynnwys y canlynol:
- llinell uwchben cylched sengl sy’n cael ei chynnal ar bolion pren rhwng Parc Ynni Nant Mithil a gorsaf newid newydd wrth droed Bryn Aberedw;
- darn o gebl o dan y ddaear lle mae’r llwybr yn croesi Afon Tywi ger Llanarthne, a
- rhai newidiadau i’r llwybr mewn mannau eraill.
Lleisio’ch barn - Dydd Mercher 13 Mawrth i 8 Mai 2024
Yn ystod yr ail rownd hon o ymgynghori, rydym yn gofyn am eich adborth ar aliniad drafft y llwybr, gan gynnwys lleoliadau arfaethedig polion pren, peilonau, ceblau o dan y ddaear, a seilwaith arall, ynghyd ag unrhyw ffactorau eraill yr hoffech i ni eu hystyried.